إحنا رجل كرسى

الكرسى...

حاول كده ثانية تركز على كرسى وفسر كل حته فيه و ركز فى قصة حياته، هتلاقى انه فيه شبه كبير قوى منك ومن حياتك. بس مش الكرسى كله على بعضه، لأ.... هى بس حته منه حسب انت مين و دورك إيه فى المجتمع اللى حواليك.

أنا مين؟

سؤال محير جداً و إستهلك مجهود عقبال ما توصلت لوجه الشبه المخيف بيني وبين الكرسى... أنا كرسى... لأ... كلنا كرسى!

نظرية رجل الكرسى...

 الحياه و المجتمع اللى حوالينا بيجبرنا على آداء دور معين فى حياتنا اليوميه وهو ده اللى بيكون شخصيتنا و بيعرفنا.

وبعد تمعن كثير و ملاحظه دقيقه توصلت إلى أن معظمنا للأسف...

رجل كرسى

هى المحور الأساسى للكرسى، يعنى من غيرها ما فيش كرسى أصلاً علشان هى اللى شايله الكرسى اللى كل الناس بتقعد عليه... سواء كانت إنتهازيه أو منافقه أو بتحور أو بتكذب أو... أو... أياً كانت فهى سلبيه و مجرد جلوسها على الكرسى بينشر هذه الطاقه الكئيبه للكرسى المسكين.

عمرك شكرت الكرسى عند جلوسك عليه؟

أكيد لأ، عارف ليه؟ لأنك ناكر للجميل و غير مقدر للشئ إلا فى حاله واحده فقط: انك متلاقيش كرسى.

رجل الكرسى مرت بناس كثيره اللى قعد وربع رجله واللى قعد ودلدلها، واللى هراها خبط واللى اعتبرها مرجيحه وتمايل بيها، ورغم كل ده بتظل هى الأقوى لأنها الأساس، رغم عدم التقدير و التقليل منها و رغم كل معانات رجل الكرسى اليوميه...

علشان إحنا طيبين... إحنا رجل كرسى...